清假

最近趕完公司隻game，呢排可以清吓假，休息吓．
話就話放假休息，點知都係好忙．．．
要幫人執相，幫人整咭片，幫人畫囍惦，準備畫展，睇演唱會，帶bibi貓貓去打針．．．呢幾日想打吓FF13都無時間．．．

傻Bi隻腳腫咗

十日前阿bi隻後腳突然腫咗，只用三隻腳行路，佢又唔比人地睇，可能太痛啦．．．

兩日後又好返，一切如常，再過多一星期，佢隻後腳又腫啦，今次真係要帶佢睇獸醫，但係當時係夜晚，好多夜診都full晒，唯有第二日朝早打去book spca，點知最快都要第二日下午，咁都照book咗先啦，好彩果日有人cancel booking，所以阿bi即日有得"zip"位睇dr.~

去到dr.都摸唔到佢咩事，可能阿bi太痛，邊個都唔比摸，dr.開咗d消炎同止痛既葯佢，過幾日覆診就要照x-ray，睇佢係咪骨折喎．．．如果係就話，就即時做埋手術．．．

佢食咗ｄ藥好好多啦，頭兩日都見佢仲有ｄ就住黎行，今日好似好返晒咁，但係尋日同佢沖涼既時侯，摸到佢大腿後面，好明顯有兩粒野，好驚佢生淋巴瘤！真係好膽心......

聽日就帶佢覆診啦，希望佢無事啦！

睇骨科

一星期內睇咗四次跌打，隻手都無咩好轉，都有ｄ急燥，睇咗差唔多成千蚊都仲係咁痛既，所以決定去睇專科．

睇咗三次專科，都係一星期內既事，但巳經好咗九成啦，醫生話可能係ｄ筯腱發炎or輕微勞損，食咗六日藥同做咗三次物理治療，巳經可以拎到重少少既野都唔覺痛，不過仲未用到十成力，醫生話發覺痛既時後到而家，都算係一段幾長既時間，隻手既機能會弱咗好多，因為呢段時間隻手都無乜點用過力，而家要用條練力帶練返ｄ力返黎，我問要練幾耐呀？醫生就話我係個懶既病人，咁快問定要練幾耐，（咁我又真係幾懶既～嘿）"最少"要練兩個月．．．所以呢兩個月最好唔好拎重野住．．．

以後開工前都要拉筯，同埋做一陣就要伸一伸D手指同郁吓個手腕，都會有幫助既，以前成日覺得呢ｄ行野，聽就聽得多，有幾個真係會做呀，不過我以後都會記得架喇．．．

仲有一樣野真係唔可以少，就係一定要買份保險，以我呢ｄ唔多病痛既，都無諗住會睇醫生，仲要一睇就睇咗四千幾蚊，差唔多買到一部"艾瘋"啦．．．同埋好彩公司好好，睇跌打claim唔足果ｄ可以向公司claim，可以慳返幾餐～

睇跌打= ="

6-3-2010.

尋日去咗睇跌打，因為隻手痛咗四星期都無好轉，都係去睇睇咩事......
醫師話d根腫咗，佢叫我暫時唔好拃筆住，邊度得丫，唉......
full咗一劑藥，感覺都係差唔多= ="，唔知要睇幾多轉至見效......


阿bi乖~

虎年行大運

恭喜發財！
個個都要身體健康！
做咩事都要順順利利！

新年第一件開心事就係豆咗五百蚊開工利是！YEAH!
又豆埋大佬大嫂兩封利是! YEAH!
過年前仲過咗probation，加咗人工！份工又揾得多過以前，今年開始可以過肥年啦～

不過臨過年就有野欄咗，例如條UM1耳塞，用咗年幾就報消，咁就順便升呢啦，最後買咗條UE 10 pro，都幾係野，不過日日都聽架麻，都直既～
仲有個銀包又用到梅梅欄欄，ｄ褸又扣唔實，換埋佢啦！

隻手唔知係咪畫畫時太用力，而家手捥背面舊骨腫咗，都痛咗兩個星期啦，而家拎有耳水杯or擰門鎖都會覺得痛，茶壼直頭拎唔起...真陰公丅_丅發覺隻中指用力就會痛，我都唔係真係成日"小"人姐～haha

家有囍事2010

2-1-2010.

大佬結婚，佢上頭果晚，舅母上咗黎屋企訓，佢訓阿媽張床，唔通要阿媽訓廰咩，所以果晚做咗廳長......果晚三點幾至訓，結果就眼光光到天光= =
當日未夠七點就起身，就落咗觀塘買西餅招呼ｄ兄弟姊妹，順個便慳咗個超級三文治既早餐～個餐都好大份吓，ｄ包上面落咗ｄ香草，好香好好食呀！如果可以一星期食一次就好喇～
當晚既甜品係腰果露丸子，我想食好耐架啦，當我拎起個"瓷更"想"不"落去既時侯，阿媽就叫我地幫手送客，我心諗返黎至食，點知一企就企咗幾個字，返到去連枱都執埋啦！十個頂呀！！哼....真係一個好大既遺憾囉........邊個陪返碗腰果露比我呀......丅^丅
返到屋企個頭真係痛到爆咁濟，因為之前果晚無訓過，姐係有成三十八個鐘頭無訓啦！都未試過咁......訓到第二朝個頭都仲係好痛，要食粒藥至得，果晚都有出街，行咗一陣都仲係好攰，街都唔想行，嘢都唔想睇喇，都係快ｄ返屋訓攤吓......

平安bi 十一歲啦~

24-12-2009.

傻bi話咁快就十一歲仔啦~仲食得跑得跳得，都仲好健康，咁咩大病痛，真係托賴啦～
以後都要健健康康呀～～